FAILIMONI

Mago ala vekamo Kalisitini vekamo agi'amo Failimoni'a Kolosi siosi vayapi'mo mai'niye. Failimonite'mo kalavusi ali'ya'mo alino mai'niya vekamo agi'amo Onesimasi'a ataleno u'nigeno Polo'a kalavusifi'mo mai'neno'ae'mo alagepa faigoko gemo ha pai'nigeno'ae'mo agesa afino fatago hu'niye. Polo'a Failimoni'a Onesimasi hosu kava'amo alino ataleteno aipamo'mo falu huno atesiyafe'mo mani avo'mo kae'niye.

Philemon

1Polo'namo Kalaisi Yesu agi'alefe'mo kalavusifi'mo mai'ne'nae'mo konagatimo'mo Timoti'e'mo mani avo'mo nekao'ae. La'ahau'niya vekamo la'agae'e'mo lokaeka Goti ali'ya'amo ne'alina vekamo Failimonigagi la'ahau'niya a kanomo Apiyagagi la'agae'e'mo lokaeno kame nehiya vekamo Akipasigagi nokafi'mo ali'a anupa hu'a mai'naya siosi vaya'efenagi huta'a mani avo'mo nekao'ae.

3Afotimo Goti'e Ala kava netimo Yesu Kalaisi'e'mo fiku lapa mae'ana lapami'anageno lapaipamo'mo falu hino.

4Konagatimoga Failimoniyo, hu'na, muki afina'mo kagaefe'mo nunumu hu'na nekate'nae'mo Goti'nimofeke'mo hao ke he'na nekatove. 5Kagaemo muki apaote vaya'aife'mo kahau kayamopafi'mo kahau'nigekae'mo Ala kava ne'mo Yesufeke'mo kagesa afika fatago hu'nana kavafe'mo kava gemo hu'nage'na afite'nae'mo Gotifeke'mo hao ke he'na nekatove. 6Kagesa afika fatago nehukae'mo muki vaya'aina hapa maeka apamisanage'apae'mo, Kalaisi Yesupi'mo mai'nigeno'ae'mo muki alagepa kava'amo aipafi'mo hane'niye, hu'a kagesayafe'mo nunumu hu'na nekatove. 7Kagaemo apaote vaya'ai apaipamo alika falu huka apatetekae'mo kahau kayamopafi'mo kahau'nigekae'mo alika lokiya vaika nelatanagetae'mo lusi kava huta lamogaga ne'aune.

8Nagaemo Kalaisipi'mo mai'ne'nae'mo himamu'aleti'mo koli osu'na kaha pai'nae'mo, ina kava'mo hisana kava'mo hane'niyanagi huvo, hu'na lokiya gemo hu'na afa'a kaha paiguva'monanafa 9kahau kayamopafi'mo kahau'niya kava'mo'a alino he tino katesiyafe'mo nahau'nige'nae'mo aukaya hu'na ge nehuve. Nagaemo Polo'namo kosuna lete'na Yesu Kalaisi agi'alefe'mo kalavusifi'mo mai'ne'nae'mo 10Goti ge'aleti'mo ali'na ate'nova mafa'ne'nimo Onesimasife'mo ge hu'na ne'atove. 11Hogoteno alagepa huno kaha o'mae'niya'monanafa hemenimo nagae'e kagae'e'mo alagepa huno la'aha maesiya agufa vekamo maiye. 12Nagaemo kagaetegamo halate aino atagineno visiyafe'mo ali'na ate'nove. Naipafi'mo nahau'niyanagi afa'a alika falu fala huka ato. 13Alagepa faigoko gelefe'mo kalavusifi'mo mai'nogeno'ae'mo kagae kaimu'yale'mo eno nagae'e'mo magokepi lokaeno mai'neno naha maesiyafe'mo nahau'niye. 14Nahau'niya'monanafa kagaefe'mo ge hu'nae'mo, alika ategeno eno kagae kaimu'yale'mo mai'neno naha maeno, hu'na hisugeka alika atesanageno eno mai'neno naha maesiyafe'mo o'nahau'nifa kagaikage'mo kagesamo afitekae'mo, afa'a uno kaha maegaiye, huka hisanafe'mo nahau'niye. 15Halate avalesanageno uno muki afina'mo kagae'e'mo maige maige huno maisiyafe'mo kataleneno aise afina'mo mai'nifi, hu'na nagesamo ne'afuve. 16Kalavusi ali'yakamo ne'aliya vekamo mago'e huno o'alino afa'a mai'niya vekae'mo lahau layamopafi'mo lahau'niya konagatimo mai'niya'mofe'mo afa'a alika falu fala huka ategane. Mago'e huno konaga'nimo'mo mai'niya'monanafa ma mopafi konagakamo'mo maige Ala kava netefe'mo konagakamo'mo maige huno mai'niya'mofe'mo afa'a alika falu fala huka atesana kava'mo hane'niye.

17Nagaefe'mo nafalu'nimo'mo mai'niye, huka kagesamo ne'afisanana alika falu fala huka ne'natesana kava huka halate alika falu fala huka ato. 18Agaemo kagaetegamo hosu kava'mo hu'nisifi kagaetegamo mago anona'amo hane'nisifige'na nagaemo ani anona'alefe'mo atale'na ategauvanagi agae agimo aeka kalo paeka ataleteka nagae nagimo avo'mo kae malo. 19Nagaemo Polo'namo mani gemo nagai'ni nayapati'mo avo'mo nekae'nae'mo anona'alefe'mo afa'a kamiguve, hu'na kaha nepauve. Kaha nepauva'monanafa nagaetegamo anonakamo hane'niyana kaunekame'mae, hu'na hisuva agufa gemo hane'niya'monanafa ani agufa gemo afa'a kaha opaiguve. 20Konaga'nimogae, hu'na, Ala kava ne'mo agi'alefe'mo namogaga aisuvafe'mo ani kava'mo huka naha mao. Kalaisipi'mo mai'neta'ae'mo naipamo alika falu huka nato. 21Ge'nimo afa'a afigiye, hu'na hute'na lole nagesamo o'afi'na magoke nagesamo afite'na mani avo'mo nekaove. Afi'novana kaha pai'nova kava'mo huka aeka agaseka mago'e alagepa kava'mo hugane. 22Kagaemo nunumu'mo nehananageno Goti'a afiteno'ae'mo kagaetegamo halate alino natesige'na visuvafe'mo agava mai'nove. Mago'e kavafe'mo hu'nae'mo, visuva afina'mo kagae nopi'mo u'na havaesuvafe'mo mago aeka anagi male'nisana yapi'mo hakika nato.

23Epafalasi'a Kalaisi Yesutefe'mo kalavusifi'mo nagae'e'mo magokepi lokaeno mai'niya vekamo'mo ge kamamae'niye. Maki'agi Alitakasi'agi Nimasi'agi Luki'agi hu'a nagae'e'mo magokepi lokae'a ali'ya'mo ne'aliya vaya'mogi'e'mo ge kamamae'nae.

25Ala kava ne'mo Yesu Kalaisi'a fiku lapa maeno nelapamiya kava'mo'a lapakae'e'mo magokepi lokaeno haneno. He, lama ge.